Jakob Joseph Frank

Dr Jakob ben Lejba (hebr.: יעקב פרנק, äigentlig Jankiew Lejbowicz) (* 1726^[1] z Korolówka^[2], Podolie, Poole-Litaue; † 10. Dezämber 1791 z Offebach am Main) isch e ostjüdische religöse Füerer gsi.

Er isch 1759 z Warschau römisch-katholisch uf e Naame Jakob Joseph Frank^[3] dauft worde, und er isch z Poole-Litaue äine vo de Erste gsi, wo brobiert het s Schtetl ufzdue, so dass d Juude, wo dört gläbt immer no in ungünstige, middelalterlige Verheltniss gläbt häi, e Zuegang zur modärne Wält wurde bechoo. Anders as in Westöiropa, wo zu deere Zit dr Moses Mendelssohn und anderi d Ufkläärig as Haskala under de Juude verbräitet häi, het dr Frank mit Hilf vom jüüdische Messianismus brobiert, ungebildeti, liichtglöibigi osteuropäischi Juude z verlocke. Er het sich as dr wiidergeboreni Messias usgee und sini Aahänger welle drvo überzüüge, as dr Talmud kä Sinn wurd mache. Er het iiri schlächte Lääbensverheltnis uf d Dröiji zur Tora zruggfüert, wo mit em Talmud wurd zämmehänke. Dorum het er festgläit, ass es nöötig sig, ass d Juude zum Christedum wurde konwerdiere.

Dr Frank isch zum Dank drfür, ass er Katholik worde isch, vom polnische König August III. in d Szlachta erhoobe worde. Si Kontra-Talmudismus oder au Frankismus het bis wit ins 20. Joorhundert iine in ganz Öiropa e groossi Wirkig gha.

Dr Jakob Frank isch äini vo de iiflussriichste Figure in dr Gschicht vom Juudedum, wo sich vollständig vom Land Israel glööst het.^[4]

1. ↑ Lut em Peter Beer in sim Buech Geschichte, Lehren und Meinungen aller bestandenen und noch bestehenden religiösen Sekten der Juden und der Geheimlehre oder Kabbalah. Brünn 1822/23, Bd.II, S.309 isch er 1712 uf d Wält choo
2. ↑ In sinere Chronik vom Lääbe isch dr Geburtsort Buczacz, was allerdings dr Frank vor dr röm.-kath. Inquisizioon gsäit isch woorschinliger. Noch däm isch er z Korolówka uf d Wält choo
3. ↑ polnisch Jakób Józef Frank
4. ↑ Klaus S. Davidowicz: Zwischen Prophetie und Häresie. Jakob Franks Leben und Lehren. S.7,155